వ్యాక్సినేషన్ 100% పూర్తి చేయాలి వైద్య ఆరోగ్య శాఖ మంత్రి హరీష్ రావు
ఫీవర్ సర్వే తో మంచి ఫలితాలు.. నియంత్రణలోకి కరోనా వ్యాప్తి
సిబ్బందికి ప్రత్యేక అభినందనలు
వైద్య ఆరోగ్య శాఖ మంత్రి హరీష్ రావు
వైద్య ఆరోగ్య శాఖ మంత్రి హరీష్ రావు ఆదివారం అన్ని జిల్లాల DMHO లు, ప్రోగ్రాం ఆఫీసర్లు, CHO లు, PHC డాక్టర్లతో టెలికాన్ఫరెన్స్ నిర్వహించారు. ఈ సందర్భంగా కరోనా పరిస్థితులు, వాక్సినేషన్, జ్వర సర్వే తదితర అంశాలపై సమీక్షించారు. హెల్త్ సెక్రెటరీ రిజ్వి, కుటుంబ సంక్షేమ శాఖ కమిషనర్ వాకాటి కరుణ, స్టేట్ ఇమ్యునైజేషన్ ఆఫీసర్ డా.సుధీర, కరోనా నోడల్ ఆఫీసర్ డా. బాలాజీ తదితరులు పాల్గొన్నారు. సీఎం కేసీఆర్ ఆదేశాల మేరకు చేపట్టిన ఫీవర్ సర్వేతో మంచి ఫలితాలు వస్తున్నాయని… కరోనా వ్యాప్తిని నియంత్రించగలుగుతున్నామ‌ని… సర్వేలో భాగస్వామ్యం అయిన అధికారులు, సిబ్బందికి వైద్య ఆరోగ్య శాఖ మంత్రి హరీష్ రావు ప్రత్యేక అభినందలు తెలిపారు. రాష్ట్రంలో ఇప్పటి వరకు కోటి పైగా ఇండ్లు కవర్ చేశామ‌ని… అన్ని జిల్లాల్లో దాదాపు మొదటి రౌండ్ పూర్తి అయ్యిందని… రెండో రౌండ్ ఫీవర్ సర్వే కొనసాగుతున్నదని వైద్యులు మంత్రికి వివ‌రించారు. కోవిడ్ ఓపీ కొనసాగించడం తో పాటు, ఏవైనా మండలాలు, ఇతర ప్రాంతాల్లో కరోనా కేసుల పెరుగుదల గుర్తిస్తే అవసరాన్ని బట్టి రెండో, మూడో ఫీవర్ సర్వేలను కొనసాగించాలని అధికారుల‌కు సూచించారు. వ్యాక్సినేషన్ అన్ని కేటగిరీల్లో వంద శాతం పూర్తయ్యేలా అధికారులు చర్యలు తీసుకోవాలని… తక్కువ ఉన్న మండలాలపై ప్రత్యేక దృష్టి సారించాలన్నారు. 18 ఏళ్లకు పైబడిన వారికి రెండు డోసులు, 60 ఏళ్లకు పైబడి కోమార్బిడ్స్ ఉన్నవారికి, ఫ్రంట్ లైన్ వారియర్స్ కు ప్రికాషన్ డోసు, 15-17 మధ్య వయసు వారికి రెండు డోసులు అన్ని జిల్లాలో 100% పూర్తి కావాలని ఆదేశించారు.
