వైభవంగా శృతిలయ ద్విదశాబ్ధి ఉత్సవాలు: నూతన అధ్యక్షురాలుగా గుడ్ల ధనలక్ష్మీ ప్రమాణ స్వీకారం

హైదరాబాద్,రవీంద్రభారతి

నిస్వార్ధ సేవతో శృతిలయ ఆర్ట్స్ అకాడమీ నాణ్యమైన కార్యక్రమాలు నిర్వహించి ఇరవయ్యో వార్షికోత్సవం జరుపుకోవడం అభినందనీయం అని తెలంగాణ తొలి శాసనసభ స్పీకర్ శ్రీ మధుసూదనాచారి శుభాకాంక్షలు తెలిపారు. మానవీయ పరిమళాలు వెదజల్లే గొప్ప మహోన్నత వ్యక్తులు ఇంకా వున్నారని, గుడ్ల ధనలక్ష్మి సేవలు గొప్ప స్ఫూర్తి ఇస్తున్నాయని ప్రశంసించారు.

సీల్ వెల్ కార్పొరేషన్ సౌజన్యం తో శుక్రవారం రవీంద్రభారతి లో శృతిలయ ఆర్ట్స్ అకాడమీ 20వ వార్షికోత్సవ వేడుకలు ఘనంగా జరిగాయి. ఈ వేడుకలను ఇటీవల దివంగతులైన డాక్టర్ ఎస్.పి.బాలసుబ్రహ్మణ్యం, లయన్ వై.కె.నాగేశ్వరరావు, బి.వెంకట్రావు లకు అంకితం చేశారు. శృతిలయ సంస్థ నూతన అధ్యక్షురాలిగా నియమితులైన సమాజ సేవకురాలు జి.ధనలక్ష్మి గారితో ముఖ్య అతిధి ఎస్.మధుసూధనాచారి ప్రమాణ స్వీకారం చేయించారు.

సేవా కార్యక్రమాలు చేసే మహానుభావులను సత్కరించుకోవడం ప్రతి ఒక్కరికి స్ఫూర్తిని ఇస్తుందని తెలంగాణ ప్రభుత్వ ఢిల్లీ పూర్వ ప్రతినిధి డాక్టర్ ఎస్.వేణుగోపాలాచారి అన్నారు. సభాధ్యక్షత వహించిన సీనియర్ పాత్రికేయులు డాక్టర్ మహ్మద్ రఫీ మాట్లాడుతూ సమాజ సేవ లో అంకితమైన వారిని గుర్తించి సన్మానాలు చేస్తూ మరోవైపు సంగీత సేవ చేస్తూ అద్భుత కార్యక్రమాలు నిర్వహిస్తూ ఆమని గొప్ప కార్యదక్షురాలు గా గుర్తింపు పొందారని అభినందించారు.

ఈ వేడుకలో శృతిలయ చైర్మన్ డాక్టర్ బి.భీమ్ రెడ్డి, తెలంగాణ పోలీస్ హోసింగ్ కార్పొరేషన్ చైర్మన్ కొల్లేటి దామోదర్, తెలంగాణ టూరిజం కార్పొరేషన్ చైర్మన్ ఉప్పల శ్రీనివాస్ గుప్తా, నాట్య గురు నిర్మల ప్రభాకర్, యువకళావాహిని అధ్యక్షులు లంక లక్ష్మి నారాయణ, ఆదర్శ ఫౌండేషన్ చైర్మన్ డాక్టర్ కుసుమ భోగరాజు, దైవజ్ఞ శర్మ తదితరులు పాల్గొన్నారు. శృతిలయ 20వ వార్షిక కేక్ ను నూతన అధ్యక్షురాలు గుడ్ల ధనలక్ష్మి కట్ చేసి శుభాకాంక్షలు తెలిపారు. ధనలక్ష్మి ట్రస్ట్ సభ్యులు పాట రూపం లో ఆమె ను అభినందించారు. గాయని ఆమని ఆధ్వర్యం లో పి.సుభాష్, బి.శ్రీనివాస్, విజయ తదితరులు ఝుమ్మంది నాదం శీర్షికతో సినీ సంగీత విభావరి నిర్వహించి ఉర్రూతలూగించారు. పి.ఎం.కె.గాంధీ వ్యాఖ్యానం చేయగా, ఆమని పర్యవేక్షించారు.