గోల్డెన్ గ్లోబ్ అవార్డ్స్ దక్కించుకున్న ‘ఆర్ఆర్ఆర్’
ఉత్తమ సాంగ్గా ‘నాటు నాటు’
తెలుగు సినిమాకు మరో అరుదైన గౌరవం లభించింది.ఆర్ఆర్ఆర్ సినిమా ఒరిజినల్‌ సాంగ్ విభాగంలో ప్రతిష్ఠాత్మక గోల్డెన్ గ్లోబ్ అవార్డును దక్కించుకున్నది. దీంతో ఆసియాలో ఈ అవార్డు అందుకున్న తొలి సినిమాగా ఆర్ఆర్ఆర్ చరిత్ర సృష్టించింది. అంతకుముందు అవార్డ్స్ వేడుక హాజరైన ఆర్ఆర్ఆర్ చిత్ర బృందం.. రెడ్‌కార్పేట్‌పై సందడి చేసింది.
ఆర్ఆర్ఆర్ నుంచి ‘నాటు నాటు’ పాటకు గోల్డెన్ గ్లోబ్ అవార్డు వరించింది. ఈ మేరకు బుధవారం కాలిఫోర్నియాలోని ది బెవర్లీ హిల్టన్ హాల్‌ వేదికగా జరిగిన ఈ అవార్డుల ప్రదానోత్సవంలో రాజమౌళి, చరణ్‌, ఎన్టీఆర్‌, కీరవాణి కుటుంబసమేతంగా పాల్గొని సందడి చేశారు. ‘నాటు నాటు’కు పురస్కారం ప్రకటించిన సమయంలో తారక్‌, రాజమౌళి, చరణ్‌.. చప్పట్లు కొడుతూ సందడి చేశారు.
నా శ్రమను, మద్దతిచ్చినవారిని నమ్ముకున్నా: కీరవాణి
అవార్డు తీసుకున్న అనంతరం కీరవాణి మాట్లాడుతూ “గోల్డెన్ గ్లోబ్ అవార్డును అందుకోవడం ఎంతో ఆనందంగా ఉంది. ఈ ప్రతిష్ఠాత్మక అవార్డును అందించిన హెచ్‌ఎఫ్‌పీఏకు ధన్యవాదాలు. సంతోష సమయాన్ని నా సతీమణితో పంచుకోవడం ఆనందంగా ఉంది. నా సోదరుడు రాజమౌళికి ఈ అవార్డు దక్కాలి. పాటలో భాగస్వామ్యమైన రాహుల్‌ సిప్లిగంజ్‌ ధన్యవాదాలు. నా శ్రమను, నాకు మద్దతు ఇచ్చిన వారిని నమ్ముకున్నాను. ఈ పాట విషయంలో నా కుమారుడు కాలభైరవ అద్భుత సహకారం అందించాడని తెలిపారు.
ఎన్టీఆర్‌-రామ్‌చరణ్‌ ప్రధాన పాత్రల్లో రాజమౌళి తెరకెక్కించిన చిత్రం ‘ఆర్ఆర్ఆర్’. కొమురం భీమ్‌, అల్లూరి సీతారామరాజులను ఉద్దేశిస్తూ కల్పిత కథగా ఇది రూపుదిద్దుకుంది. యాక్షన్‌, ఎమోషనల్‌ ఎంటర్‌టైనర్‌గా తెరకెక్కిన ఈ సినిమా గతేడాది మార్చి నెలలో విడుదలై ప్రపంచవ్యాప్తంగా గుర్తింపు దక్కించుకుంది. ముఖ్యంగా ఈ సినిమాలోని ‘నాటు నాటు’ పాటకు అంతటా మంచి రెస్పాన్స్‌ లభించింది. విదేశీయులను సైతం ఈ పాట ఉర్రూతలూగించింది. చంద్రబోస్‌ ఈ పాటను రచించగా.. ప్రేమ్‌ రక్షిత్‌ కొరియోగ్రఫీ అందించారు.
