రేపు కొత్తగూడా కొండాపూర్ జంక్షన్ల మల్టీ లెవెల్ ఫ్లైఓవర్ ను ప్రారంభించనున్న మంత్రి కేటీఆర్
కొత్త సంవత్సరం రోజున హైదరాబాద్ నగర వాసులకు మరొక కీలకమైన ఫ్లైఓవర్ అందుబాటులోకి రానుంది. బొటానికల్ గార్డెన్ వద్ద నిర్మిస్తున్న కొత్తగూడ మరియు కొండాపూర్ జంక్షన్ లను కలిపే మల్టీ లెవెల్ ఫ్లైఓవర్ ను రేపు మంత్రి కే. తారక రామారావు ప్రారంభించనున్నారు. 263 కోట్ల రూపాయల నిర్మాణంతో చేపట్టిన 2.21 ఈ ప్రాజెక్టులో కిలోమీటర్ల ఫ్లైఓవర్ భాగం, మరో 784 మీటర్ల ర్యాంపులు భాగంగా ఉన్నవి. దాదాపు మూడు కిలోమీటర్ల మేర ఉన్న ఈ ఫ్లైఓవర్ ఎస్ఎల్ఎన్ టెర్మినస్, బొటానికల్ గార్డెన్, కొత్తగూడ, కొండాపూర్ వంటి ప్రాంతాల్లో తరచుగా పోగయ్యే ట్రాఫిక్ రద్దీని తగ్గించేందుకు ఈ ప్రాజెక్టుతో వీలు కలుగుతుంది.
మజీద్ బండ రోడ్డు నుంచి బొటానికల్ గార్డెన్ జంక్షన్ వరకు 401 కిలో మీటర్ల ర్యాంపు, కొత్తగూడ జంక్షన్ నుంచి హైటెక్ సిటీ వైపు 383 మీటర్ల ర్యాంపు నిర్మాణం జరిగింది. కొత్తగూడ జంక్షన్ వద్ద మూడు లైన్లతో నిర్మిస్తున్న అండర్పాస్ 470 మీటర్ల పొడవున ఉన్నది. దీంతో హఫీజ్ పేట్ నుంచి గచ్చిబౌలి వెళ్లే ట్రాఫిక్ సునాయాసంగా ముందుకు కదులుతుంది.
ఈ ప్రాజెక్టు ప్రజలకు అందుబాటులో రావడంతో బొటానికల్ గార్డెన్ జంక్షన్ మరియు కొత్తగూడా జంక్షన్ వద్ద 100% ట్రాఫిక్ రద్దీ తగ్గుతుంది. దీంతోపాటు కొండాపూర్ జంక్షన్ వద్ద ట్రాఫిక్ రద్దీ దాదాపుగా 70% తగ్గే అవకాశం ఉన్నది. దీంతో ఫైనాన్షియల్ డిస్ట్రిక్ట్, హైటెక్ సిటీ వరకు విస్తరించి ఉన్న అనేక ఐటి మరియు ఇతర సంస్థలలోని ఉద్యోగులకు , నగర ప్రజలకు ట్రాఫిక్ కష్టాలు తొలగే అవకాశం కలుగుతుంది.
